Вена, пятніца, добрае надвор’е, якое не часта радуе жыхароў тамтэйшай сталіцы, што прымусіла мяне задумацца і перагледзець свой рэйтынг «шэрых / змрочных гарадоў», у якім Менск займаў першае месца. Больш за месяц я не адважвалася зайсці ў гэты будынак, і мая няўпэўненасць была выкліканая, хутчэй, жаданнем адцягнуць прыемны момант (як калі самае смачнае пакідаеш на потым), чым сцішшу перад сучасным мастацтвам.
MUMOK— шматабяцальная абрэвіятура. Такая ж маналітная, як і сам будынак. Сем паверхаў: чатыры ўгару — тры долу.
На самым версе — 5 мастакоў: Джон Балдэсары — амерыканскі прадстаўнік мінімалізму і канцэптуальнага мастацтва. Майк Келі — таксама амерыканец, вучань Балдэсары, працы якога падаліся мне найбольш цікавымі. Часта ягоная ўвага скіравана на дзіцячыя траўмы, успаміны і сацыяльныя нормы. «MemoryWare» («Прадукты памяці») уяўляе з сябе серыю прац, «MemoryWareFlat #18» (2001) — гэта вялізнае (216 х 318) палатно, на якое хаатычна прымацаваныя розныя дробязі, пярсцёнкі, асадкі, значкі, перліны, бранзалеткі, гузікі, ракавінкі, гадзіннікі і ўсё-ўсё, што можна адшукаць у сябе дома, пакорпаўшыся ў шафах і скрынях са старызнай. Гэты аб’ект можна вывучаць гадзінамі, першы раз я прачытала назву не як «MemoryWare», а як «MemoryWave» («Хваля памяці») — і, думаецца, падсвядомасць не проста так падкінула гэтую ідэю, бо, калі я стаяла там, перад гэтым нагрувашчваннем смецця для адных і скарбніцай для іншых, мяне пачала захлістваць хваля ўспамінаў з дзяцінства.
Кожны раз, сустракаючы такія творы сучаснага мастацтва, я быццам адкрываю нешта новае, хоць на самой справе гэта ўжо сядзела недзе ўва мне, а мастак проста здолеў пацягнуць за нейкую слушную нітачку — і оп-ля: я квітнею эмоцыямі і ўнутрана ўсміхаюся, быццам у момант revelation.
Пол МакКарці — амерыканскі мастак, майстра гратэску і шакавання, быў прадстаўлены інсталяцыяй «BavarianKick» (1987) («Баварскі штурхель»), якая ўяўляла з сябе павялічаны (у вышыню недзе метры 2) механізм, на аснове якога замацаваныя баварскі мужчына і баварская жанчына, кожны за сваімі дзвярыма, якія праз нейкі час «выходзяць» са сваіх дзвярэй, чокаюцца куфлямі з півам і даюць адно адному выспятка нагой. Ілюстрацыя вечнай тэзы, што каханне і нянавісць ходзяць поруч.
Бельгійскі мастак Ян Веркруіс быў вымушаны глядзець са здымкаў-аўтапартрэтаў акурат на інсталяцыю Пола МакКарці, але, здаецца, гэта яго не вельмі засмучала, бо ён быў паглыблены ў шахматную гульню і разгляданне пясочнага гадзінніка.
Марцін Кіпенбергер — нямецкі мастак, прадстаўнік Новых дзікіх (ням. NeueWilde— група нямецкіх і аўстрыйскіх мастакоў, што ў 1980-я вырашылі парваць з мінімалізмам і канцэптуальным мастацтвам, вярнуўшыся да ідэй фавістаў), з даволі правакатыўнымі працамі, якія чамусь не знайшлі ўва мне водгуку, — пэўна, быццё (якое вызначае свядомасць) апынулася для нас розным. Гісторыі вакол Кіпенбергера падаліся мне значна цікавейшымі за самі працы (зноў жа абмоўлюся — за тыя, што былі прадстаўлены ў MUMOK). Так, напрыклад, выпадак з ягонай інсталяцыяй «Wenn’s anfängt durch die Decke zu tropfen» («Калі пачынае кропаць з даху»),
калі прыбіральшчыца Дортмундскага музея «Остваль» вырашыла пачысціць «брудную» пляму на творы мастацтва, — сапсаваўшы працу (якая была, аднак, застрахаваная на 800 000 еўра).
Ёсць падазрэнне, што стасункі абслугоўваючага персаналу і сучасных мастакоў у музеях ці галерэях — асобная тэма для даследавання. Цэлы дзень знаходзіцца ў памяшканні, дзе крычаць два тэлевізары, проста немажліва, нават калі ты вельмі любіш сучаснае мастацтва. Пакуль я хадзіла па залі паверха нумар 3, наглядчык (гэта, дарэчы, яшчэ адна рэч, нетыповая для беларускіх музеяў: маецца на ўвазе, што гэта не бабулькі ці жанчыны пенсійнага ўзросту, а сімпатычныя і не вельмі мужчыны) спачатку ціха, а потым усё гучней і агрэсіўней дражніў людзей з тэлевізара, затым паклікаў калегу з суседняй залі і папрасіў пабыць тут нейкі час замест яго.
Аўтар, прадстаўлены на трэцім паверсе, што так нерваваў наглядчыка, — Брус Наўман — амерыканскі мастак, вядомы сваёй шматграннасцю (праца з гукам, скульптура, неонавыя надпісы-інсталяцыі), галоўным крэда якога выступае стварэнне сітуацый, якія б дэзарыентавалі гледачоў. Відэаінсталяцыя «Goodboybadboy» (1985) — гэта два тэлевізары, на адным з якіх — белая жанчына сярэдніх гадоў, а на другім — малады афра-амерыканец. Яны паўтараюць адны і тыя ж фразы, мяняючы спражэнне дзеяслова «tobe» ў выказваннях: «Iamagoodboy / Wearegoodboy…» («Я добры хлопец / Мы добрыя хлопцы…») і «Ihate / Youhate / Wehate / Thisishating…» («Я ненавіджу / Ты ненавідзіш / Мы ненавідзім / Гэта ненавісна») — пры гэтым кожным разам мяняецца інтанацыя, якая ад спакойнай перарастае ў агрэсіўную.
2.
Першае, што кідаецца ў вочы, калі заходзіш на другі паверх, — сцяна, завешаная аркушамі паперы А-4 ў рамках, на якіх адбіты розныя лічбы. А вось і канцэптуалісты. Я набліжаюся да аркушаў і пачынаю разгадваць загадку: чаму такая паслядоўнасць, чаму гэтыя лічбы? Складваю, памнажаю і — о цуд — я знаходжу ключ да паслядоўнасці і радуюся, як дзіця. Наведвальнікі, што заходзяць у залю пасля мяне, не настолькі цікаўныя, яны сузіраюць гэтае мора лічбаў і літар і крочаць далей.
Адзіная жанчына на гэтым паверсе (калі не лічыць мяне і яшчэ парачку наведвальніц) — нямецкая мастачка Хане Дарбовен. Яна, як і японец Он Кавара, паглыблена ў асэнсаванне часу як прасторы. Ейная праца «EinJahrhundert (Bücherei)» («Тысячагоддзе (Бібліятэка)», 1970–71 гг.) адлюстроўвае час выпадковага стагоддзя ў абстрактнай форме, што мяняе погляд на час як на нешта лінейнае. Пачынаючы з першага дня кожнага месяца стагоддзя, Хане Дарбовен складае лічбы кожнай даты: напрыклад, 28.02.14 будзе 17, бо 2+8+2+1+4=17. Цікава, што некаторыя іншыя даты, калі скласці іх лічбы, будуць мець тую ж «выніковую» лічбу, напрыклад, 30.05.54 альбо 01.01.96. Усе гэтыя вылічэнні размяшчаюцца на аркушах паперы, што і прадстаўлены гледачам.
Он Кавара робіць штосьці падобнае. Ягоная праца «OneMillionYears» («Мільён гадоў», 1970) — гэта 10 тамоў па 200 старонак, на кожнай з якой змяшчаецца па 500 датаў. Усё пачынаецца з года 9983131 д. н. э і сканчваецца 1969 г. н. э.
Праца, якая спрабуе візуалізаваць той час (мільён гадоў), што быў да моманту стварэння гэтага твора мастацтва. Фізічная прысутнасць такога прамежку часу выклікае супярэчлівыя пачуцці: быццам шмат, а быццам і мала.
Далей — больш інсталяцыйных аб’ектаў, што працуюць на цялеснае ўспрыняцце сябе ў прасторы: Карл Андрэ, Сол Ле Віт, Дональд Джад, Франц Вэст, Мікеланджэла Пісталета і інш.
3.
Першы ўзровень адведзены тром мастакам рознага пакалення, якія, аднак, уздымаюць адно пытанне — як магчыма мастацтва. Зноў толькі мужчыны: Герхард Рыхтэр, Хайма Цоберніх, Марсэль Бродхарс, — праўда, на гэтым паверсе ўжо сустракаюцца і наглядальніцы. Спынюся на апошнім з аўтараў. Марсэль Бродхарс — бельгійскі паэт, рэжысёр, скульптар, які ў свае 40 гадоў вырашыў прысвяціць сябе візуальнаму мастацтву. Дарэчы, чатыры верхнія ўзроўні — гэта творы з калекцыі Антона і Анік Герберт, да якіх дададзены экспанаты з калекцыі MUMOK таго ж перыяду, аб’яднаныя пад назвай «Musée à vendre pour cause de faillite» («Музей на продаж з прычыны банкруцтва»), якая належыць Бродхарсу. Маю ўвагу гэты мастак прыцягнуў сваімі эксперыментамі з мовай і мастацтвам.
Напрыклад, праца «Carte du Monde Poétique» («Паэтычная мапа свету»), дзе зверху на першапачатковым надпісы «Carte du Monde Politique» («Палітычная мапа свету») у слове «politique» закрэслена «li» (лі) і ўстаўлена «е» (э). Сутнасць у назве, бо больш на мапе нічога незвычайнага няма, але канцэптуальна гэта прымушае глядзець на яе інакш. Вось яна — сіла слова.
Паверхі —1 і 3 — акупаваныя працамі, аб’яднанымі пад назвай «DieGegenwartderModerne» — шмат аб’ектаў, менш палотнаў і відэа, імёны ад вядомых да малавядомых, але з усяго гэтага збору мне запала / запомнілася толькі адна праца — аўстрыйскай мастачкі Ганны Артакер. І жаданне распавесці менавіта пра гэтую работу прымусіла мяне сесці за гэтае эсэ.
«Невядомы авангард» — серыя з дзесяці гістарычных здымкаў, што вісяць на сцяне ў шэраг. Група сюррэалістаў, група дадаістаў і г. д., ля кожнай фатаграфіі побач ёсць легенда, на якой пазначаны ўсе, хто прысутнічае на здымку.
Ходзіш, чытаеш імёны, бачыш, што ёсць тыя, імёны якіх не захаваліся, яны пазначаны ў легендзе як «unbekannt» («невядома»).
Ну і што. Здымкі як здымкі, магчыма, цікавыя гісторыкам мастацтва і аматарам фатаграфіі, але праз пэўны час пачынаеш заўважаць адну заканамернасць: на ўсіх здымках толькі па адной жанчыне, а потым заўважаеш і другую заканамернасць — постаці, пазначаныя словам «unbekannt» — і ёсць тыя жанчыны. Правяраеш да канца шэрагу — усё сыходзіцца, і тады ты разумееш задумку мастачкі. Прысутнасць жанчын у гісторыі як такой, і гісторыі мастацтва ў прыватнасці — тэма, якая ўздымаецца ў гэтай працы і якая настолькі трапна і элегантна выказана Ганнай Аркерт пры дапамозе мастацкіх сродкаў.
Я ўсміхаюся разам з аўтаркай, настрой мой паляпшаецца, нарэшце на сямі паверхах знайшлося тое, што так выкшталцона ўшчыпнула патрыярхат за ягоны тлусты бачок. Побач чуецца руская мова, мужчына, смеючыся, дзеліцца ўражаннямі з сяброўкай: «Слушай, если б наших школьников водили смотреть на такое, сразу бы позвонили директору». Справа ў тым, што тут школьнікам сапраўды ладзяць адмысловыя заняткі і сустрэчы, на якіх распавядаюць пра гэта «страшнае і незразумелае» сучаснае мастацтва.
Справа густу — любіць яго ці не, але прынамсі вы атрымліваеце інструмент, каб пры жаданні мець магчымасць пакорпацца ў целе мастацтва і, магчыма, адшукаць штось для душы.
Візіт у MUMOKчарговым разам запэўніў, што сучаснае мастацтва — гэта складаны, далёка не адназначны феномен, проста глядзець на які — ужо не атрымаецца, тут трэба думаць, ведаць і адчуваць. Як і для фемінізму, для сучаснага мастацтва неабходна эмпатыя, інакш яго прачытанне можа застацца на ўзроўні «унылое говно».
Вольга Гапеева
Фатаграфіі © Вольга Гапеева. На вокладцы: Брус Наўман «Секс і Смерць», 1985
Меркаванні аўтараў не заўсёды супадаюць з пазіцыяй рэдакцыі. Калі вы заўважылі памылкі, калі ласка, пішыце нам.