V Форум тэатральнага мастацтва «ТЭАРТ» прадставіць гледачам работы легендарных рэжысёраў сусветнага тэатра. Упершыню ў Менск прыедзе швейцарскі рэжысёр Даніэле Фінцы Паска, які здабыў міжнароднае прызнанне пастаноўкамі ў Cirque du Soleil (Цырк дзю Салей) і Cirque Eloize (Цырк Элуаз). Яго называюць «клоўнам ад Бога, што стварае адчуванне цуду». Чароўнае спалучэнне цыркавых нумароў у духу фільмаў Феліні з чэхаўскай глыбінёй менскі глядач убачыць 29 і 30 верасня. Спектаклем «Донка — пасланне Чэхаву» адкрыецца «ТЭАРТ-2015».
30 верасня і 1 кастрычніка на сцэне Беларускага дзяржаўнага маладзёжнага тэатра сыграюць «Латышскае каханне» — гісторыі кахання, знойдзенага па абвестках у газетах, ад самага знакамітага латышскага рэжысёра Алвіса Херманіса.
Італьянскі баламут, сябра і паслядоўнік Піны Баўш Піпа Дэльбона прывозіць у Менск свае «Архідэі», спектакль-калаж з тэкстаў класікаў — Шэкспіра і Чэхава, амерыканскага бунтаўніка 50-х Джэка Керуака пад гукі Deep Purple. Убачыць яркае і крыху шакуючае дзейства можна будзе 4 кастрычніка на сцэне Палаца культуры МАЗ.
«Ворага народа» пакажа легендарны Томас Остэрмаер, кіраўнік вядучага нямецкага тэатра Shaubunhe Berlin і шматразовы ўдзельнік Авіньёнскага фестывалю. Менскі глядач зможа ўбачыць спектакль, пастаўлены паводле аднайменнай п’есы Генрыка Ібсена, 9-10 кастрычніка ў Палацы культуры МАЗ.
У юбілейны год «ТЭАРТа» ў Менск прыедзе спектакль Льва Додзіна, мастацкага кіраўніка Акадэмічнага Малога драматычнага тэатра ў Санкт-Пецярбургу, уганараванага званнем «Тэатр Еўропы». Для пастаноўкі аднайменнага твора Васіля Гросмана «Жыццё і лёс» слынны рэжысёр каля чатырох гадоў перапрацоўваў тэкст рамана ў п’есу. Адну з галоўных роляў у спектаклі грае вучаніца Додзіна, вядомая расійская актрыса Лізавета Баярская. Глядзіце 16-17 кастрычніка на сцэне Беларускага рэспубліканскага тэатра юнага гледача.
Новае прачытанне «Яўгена Анегіна» ўбачаць гледачы 12-13 кастрычніка ў ТЮГу. Цімафей Кулябін, двойчы лаўрэат прэміі «Залатая маска» 2014 года, адпрэчвае знаёмае нам са школы ўяўленне пра «энцыклапедыю рускага жыцця» і выводзіць на першы план унутраныя перажыванні герояў.
Прыедзе сёлета і знакаміты вучань Льва Додзіна, знаёмы менскаму гледачу па працы з Паўлам Пражко, — рэжысёр Дзмітрый Ваўкастрэлаў. «Танец Дэлі» — яго работа паводле п’есы Івана Вырыпаева — зборнік з 7 навелаў пра смерць, чалавечыя беды і вінаватых. Спектакль ужо ставіў у тэатры і ў кіно сам Вырыпаеў, тым цікавей параўнаць аўтарскую інтэрпрэтацыю з бачаннем Дзмітрыя Ваўкастрэлава. 18 кастрычніка ў Новым драматычным тэатры (блэк-бокс).
10 і 11 кастрычніка ў Камернай зале Нацыянальнага акадэмічнага тэатра імя Янкі Купалы гледачоў чакае адзін з самых незвычайных спектакляў форуму — «MATHATRIA». Matchatria па-японску — высокатэхналагічнае прадстаўленне, якое самі аўтары называюць інсталяцыяй. Яна яднае ў сабе танец (у выкананні адной з лепшых танцоўшчыц сучаснасці Юі Кавагуці), 3D-графіку (тварэнне мастака Ёсімаса Ісібасі), аўдыякалажы і праўдзіва японскую цырыманіяльнасць.
На юбілейным форуме будзе як ніколі шмат музыкі. Спектакль-джаз «Старына Монк», заснаваны на біяграфіі выбітнага джазавага музыканта, родапачынальніка бібопу — Тэлоніуса Монка, агорне гледачоў расповедам пра старэнне і немагчымасць цела і духу існаваць у гармоніі. Адбудзецца музычны спектакль 6-7 кастрычніка на сцэне Палаца культуры прафсаюзаў.
Хуліганы «Тэатр ТАР» на чале з Вілмашам Вайдаі прадставяць гледачам перапрацаванага Астроўскага, шчодра дадаючы ў класічную п’есу пякучай насмешкі, бунтарскага духу і арыгінальнага музычнага акампанементу. «Прыбытковае месца» ў такой незвычайнай версіі можна будзе пабачыць (і пачуць) у Палацы культуры прафсаюзаў 19 кастрычніка.
Упершыню з музычным перформансам прымае ўдзел Украіна. Dakh Daughters Band — сем актрыс кіеўскага тэатра ДАХ узялі ў рукі музычныя інструменты, каб з грымучай сумесі славянскіх матываў, Шэкспіра, французскай паэзіі ды сусветных хітоў стварыць жыццесцвярджальны перформанс пра каханне, свабоду і прыгажосць. 22 кастрычніка на сцэне Палаца культуры МАЗ.
Закрываць міжнародную праграму юбілейнага форуму «ТЭАРТ» 23 кастрычніка ў Нацыянальным тэатры імя Янкі Купалы будзе дзівосна прыгожы «шэкспіраўскі» спектакль Лявана Цуладзэ «Ці вам тое даспадобы» ў выкананні Тбіліскага акадэмічнага тэатра імя Катэ Марджанішвілі.
Праграма беларускіх спектакляў Belarus Open сёлета вартая асаблівай увагі. Яна пройдзе ў межах «ТЭАРТа» ўжо трэці раз, аднак у гэтым годзе Belarus Open мяняе свой фармат і робіцца айчынным шоукейсам.
У праграме сабраны лепшыя тэатральныя пастаноўкі 2014 года: менавіта ў іх з’явіцца шанец заявіць пра сябе як у Беларусі, так і на міжнародным узроўні.
Беларуская праграма дазволіць гледачам, не пакідаючы Менск, пазнаёміцца з лепшымі пастаноўкамі Магілёўскага і Брэсцкага тэатраў. У праграму таксама ўвайшлі прэм’ерныя паказы новай работы Яўгена Карняга «Інтэрв’ю з вядзьмаркамі» і пластычнага спектакля Вольгі Лабоўкінай (KARAKULI) VASEN-EXTASSEN. Парадуе праграма размаітасцю тэатральных жанраў і формаў: беларусы прадставяць новую драму і сайт-спецыфік, пластычны і лялечны тэатры. Да слова, лялечныя сцэнічныя творы ўдзельнічаюць у форуме ўпершыню.
Падрабязней мы будзем распавядаць цягам бліжэйшых месяцаў, а ўжо цяпер набываць квіткі на спектаклі можна на сайце www.teart.by, а таксама на сайце і ў касах www.kvitki.by, на сайце і ў касах НАТ імя Янкі Купалы.