COOL’OK падзеяў 2015! Самыя знакавыя і запамінальныя падзеі культурнага жыцця вуснамі беларускіх «пАРТызанак» і «пАРТызанаў»!
Адам Глобус, пісьменнік, мастак, выдавец:
Фота Алены Адамчык
Культурныя падзеі, што мяне парадавалі ў 2015 годзе:
- У галерэі «Ў» свежыя настроі панавалі на выставе «Мара марака»;
- Андрэй Кудзіненка распачаў праект з кароткаметражнымі фільмамі;
- Людмілу Русаву ўшанавалі рэтраспектыўнай выставай у галерэі «Ў»;
- Альгерд Бахарэвіч за кнігу эсэ «Ніякай літасці Альгерду Б.» атрымаў прэмію «Залатая літара»;
- Андрэй Хадановіч у чарговы раз правёў паэтычны фестываль у гонар Міхася Стральцова;
- Уладзіміра Дубоўку цёпла згадвалі ў музеі Броўкі;
- Саша Злотнік і Гена Валяваты пачалі выданне серыі «Мая беларуская кніга»;
- Сяргей Будкін на сайце «Тузін гітоў» сабраў шмат якаснай беларускай музыкі.
- Анастасію Шпакоўскую самыя розныя людзі падтрымалі ў яе праве выконваць песню «Малітва» на словы Янкі Купалы;
- Віктар Казько атрымаў літаратурную прэмію Ежы Гедройца;
- Вячаслаў Ракіцкі зрабіў фільм «Сведкі» пра нашае змаганне за беларускую незалежнасць у змрочным і антычалавечым СССР.