11 лютага ў Амбасадзе Рэспублікі Польшча ў Менску адбылася прэс-канфэрэнцыя з нагоды абвяшчэньня шорт-ліста прэміі імя Ежы Гедройца.
На сустрэчы выступілі ганаровы старшыня журы Надзвычайны й Паўнамоцны Амбасадар Рэспублікі Польшча ў Рэспубліцы Беларусь Лешак Шарэпка, старшыня Беларускага ПЭН-Цэнтру, паэт, перакладчык Андрэй Хадановіч, старшыня Саюзу беларускіх пісьменьнікаў, празаік Барыс Пятровіч. Напачатку спадар Лешак Шарэпка падкрэсьліў, што прэмія мае сваёй галоўнай мэтай ацаніць мастацкую вартасьць кніг і падтрымаць сучасную беларускую прозу. Барыс Пятровіч падзякаваў за ідэю стварэньня прэміі польскаму боку й «Сомбелбанку», распавёў пра тое, як працавала журы.
Больш за 40 кніг сёлета былі пададзеныя на прэмію, і выбар для сяброў журы быў няпросты. Цягам студзеня на сайце прэміі імя Ежы Гедройца былі апублікаваныя рэцэнзіі маладых крытыкаў на 12 кніг, што патрапілі ў лонг-ліст.
ШОРТ-ЛІСТЭРАМІ сталі 6 кніг наступных аўтараў:
Сяргей Балахонаў «Зямля пад крыламі Фэнікса»
Альгерд Бахарэвіч «Гамбурскі рахунак Бахарэвіча»
Адам Глобус «Сказы»
Уладзімер Някляеў «Аўтамат з газіроўкай з сыропам і без»
Людміла Рублеўская «Авантуры Пранціша Вырвіча, шкаляра і шпега»
Юры Станкевіч «Шал»
Віншуем празаікаў, якія сталі фіналістамі! Пераможца будзе абвешчаны 1 сакавіка, у Сусьветны дзень пісьменьніка.
Крыніца \ lit-bel.org